Mar 13 | TPA | STEP | Yesu maranai Maimaituwa ana Numa* i vomahiri aharei, ma a tauvotagho emosi i ripa, “Tauvihanahanapu, ma inanai! We gha'imahi hi ahi ghagha ma ghaeghaehiyei we numahi waiguyaunana hi vowai.”

Mark 13

Yesu i Riwa da Muriyai Maimaituwa ana Numa* hina Goruhi

(Matthew 24:1-2; Luke 21:5-6)

1 Yesu maranai Maimaituwa ana Numa* i vomahiri aharei, ma a tauvotagho emosi i ripa, “Tauvihanahanapu, ma inanai! We gha'imahi hi ahi ghagha ma ghaeghaehiyei we numahi waiguyaunana hi vowai.”

2 Ma Yesu i paribeei ipa, “U inanai we numahi ghaeghaehina! Apo egha gha'ima emosi ana au gabu ina ma'ae, atapuna apo rava hina goruhi.”

Piripiri Ghaeghaehi apo Rava hina Vi'aroni, Tauvitumaghana hina Vojijina

(Matthew 24:3-14; Luke 21:7-19)

3 Maranai Yesu i tughutughura Oya Olive autepana, Maimaituwa ana Numa* ma autupo ghehauna, ma Peter, James, John ma Andrew, hi vaini po auririva ma hi raubayadei hipa, 4 “Ma riwe'ai, meyanai we ginaurihi apo hina tupuwa, ma apo matakiraha aiwa a inanai da eighereghere po ina tupuwa?”

5 Ma Yesu i riwehi ipa, “Ona inana vaimaiha po egha aiya ina rautayahabo'ami. 6 Rava magha apo wava'uwei hina ne'i ma hinapa, ‘Ta'u yana tauna!’ Ma rava magha apo hina rautayahabo'ahi. 7 Egha nuwanuwami ina ara'arayaguri maranai ghaviya tuyeghana o nonori po aughereghere bo auheiya. We dewahi yana apo hina tupuwa, ma yamna egha mara damona ita ghe'eta. 8 Dobu hina vitona vivira ma dam hina vitona vivira. Ma dobu ghehauhi apo yoyo ina ravihi ma wate gomara ina ra'ata. We dewahi yana me wavina duwaduwamana ana voavoa viuvana ei kare, ma muriyai apo'apoe dumana ina ne'i.

9 Taumi ona pa'inameemi, apo ami ghaviya hina panimi ma hina amverenemi ani vi'emosi numana babadahi auwarihi. Ma hina kwapumi anivi'emosi au numahi, ma oi tumaghane'u aubaina dobu babadahi aunaohi ona mahiri ma hina hetaremi anima tuyegha ahi'ahina ona rauguguyei auwarihi. 10 Ma muriyai da damona ina ne'i, yana a'u tauvotagho tuyegha'u ahi'ahina rava atapuhi auwarihi hina rauguguyei. 11 Ma maranai hina panimi yana rauhetara auwarina egha onai nuwaboya da apo me ona vibabaninei. Na au marana aiwa i raughe'etei yana ona yatoni, babana aiwa e yatoyatoniya yana Aruwa Vivireinei ma egha taumiei. 12 Rava varevarehihi hina amverenehi babada auwarihi po hina vihiraghenihi, ma ama apo natunatuhi auwarihi nana'arena hina dewai, ma natunatu apo taughunihi hina vighaviyehi ma hina vihiraghenihi. 13 Ma o votagho'u aubaina apo rava atapuhi hina gedu'aiemi, ma rava aiya ina ma'e momota po au damona yana apo ina yawahana.”

Piripiri Apo'apoe Dumana

(Matthew 24:15-28; Luke 21:20-24)

14 Yesu i ripa, “Ginauri apo'apoe dumana apo ona inanai ina raughe'etei au dobu mepa egha ita rauinanaiyana. ^{▼▼13:14Daniel 9:27; 2 Thessalonians 2:4; Au Matthew 24:15 Yesu i riwa apo ona inana Maimaituwa a au Numa.} (Tauhiyava we bukana o hiyahiyavi ona vinuwanuwatuhuwana vaimahi'eni.) Anima au Judea tauma'ae yana hina virovoiyana au oya. 15 Rava aiya numa autepana egha ana hauga ina aharei, po ina hopu au numa ma ina rui po a nimapota aiwa ina vaini. 16 Rava aiya au 'wapu, yana egha ana hauga ina aharei po ina wanavirai a au numa, po anirauhawawara ina vaini. 17 No haugahi yana apo hina apo'apoe duma waivine duwaduwamahi, ma waighughuhi auwarihi! 18 Ona raupari po ami rovo egha hauga apo'apoe ina wawara na au marana! 19 Babana no haugahi yana apo hina apo'apoe duma, egha hauga ghehauna meyanai dobu we nana'arena ita hanapuwei. Maranai au karena Maimaituwa dobu i viwawari ma i ne po we amado'i. Wate apo eghaiwa ghehauna we nana'arena ina tupuwame. 20 Ma Bada we marana piripirina ina raitupoi, ma itapa e'egha, apo egha aiya ita ma'ama'ae. Ma ana rava aubaihi we marana i raitupoi.

21 Anima na au marana aiya ina riwa inapa, ‘Ona inana, Keriso, Maimaituwa a Vinevine Waiyawahanana* wehidana!’ bo, ‘Ona inanai tauna nohidana!’ yana egha onai tumaghanei. 22 Babana keriso waimorumoruhi, ma peroveta waimorumoruhi apo hina vomahiri. Apo matakiraha po ani amhuna hina voghe'etehi, po Maimaituwa ana rava vinevinehi hina rautayahabo'ahi yamna inapa emo'emosina. 23 Yamna aubaina ona inana vaimaiha! Muriyai po we dewahi hina tupuwa yana a ririwemi.”

Rava Natuna a Nememeei

(Matthew 24:29-31; Luke 21:25-28)

24 Anima Yesu ipa, “Piripiri apo'apoe dumahi aumurina

‘ginauri atapuhi kajikajijirahi au mara hina viguhuguhu.
Madegha apo ina waguvarei ma nawaravi egha ina raraname, ^{▼▼13:24Isaiah 13:10}
ma kipora aidamoei hina pe'u.’ ^{▼▼13:25Isaiah 34:4}
26 Na au marana rava atapuhi hina ina'inana, ma Ta'u Rava Natuna au hapau kajijira ma borumana maitehi ana ne'i. ^{▼▼13:26Daniel 7:13} 27 Anima a aneya* ina himirihi dobu tupo wahepari po ana rava vinevinehi ina boinihima'i dobu au mutuna po au mutuna.”

Eyagi Kaiyaha Ampariruvaruvana

(Matthew 24:32-35; Luke 21:29-33)

28 “Vihanahanapu kaiyaha auwarina tana vaini. Maranai raghana e raunabinabi po ruguruguna e tereterei, yana ta hanapuwei da raupupu ana mara e tutugheregherei. 29 Nana'arena ona inanai ma we ginaurihi hina tuputupuwa, yana ona haramanei da Ta'u Rava Natuna a'u nememeei ana mara i vighereghere we au mata'eta. 30 Moina a ririwana dumemi, we hapana o mahimahiri apo yohora ona ma'ama'ae ma we dewahi ataphi apo hina wawara. 31 Mara ma dobu hina hamowa, ma pona'u apo egha meyanai ina hamowa.”

Yesu a Wanavira Aubaina ta Vononogha

(Matthew 24:36-44)

32 “Egha aiya ita hanapuwei da metauna maratomna, bo mara aiwa apo ina ne'i, aneya* au mara ma Natuna egha hita haramanei, ma Amana tau'avana. 33 Onai raurau'ona, ma onai mayavaivaina, babana egha ota haramanei mara aiwa'i apo na marana ina ne'i. 34 Ani'inana me rava ana numa i ne'aharei ma a hewahewari i autanihi, po yamoha a bagibagi ina dewadewai, ma mata'eta taupa'inina i riwei po inai raurau'ona. 35 Yamna aubaina onai raurau'ona babana egha ota hanapuwei da numa taniwagana mara aiwa ina wanavirai. Mepapo aubigai bo waguvara aupouna, bo kamkam ina toutou au maratomtom bo madegha e ghe'eghe'eta. 36 Ona vononogha inapa ina raighohoghorimi, yana egha ina nehaghami da taumi o eno'eno. 37 Aiwa a ririwemi yana rava atapuhi auwarihi nana'arena, onai raurau'ona.”